கை.அறிவழகன் எழுதியவை | ஜூலை 14, 2011

கனவுகளின் கதை……..

dream_a_z

திட்டுத் திட்டாய் மணல் உறைந்து போயிருக்கிறது, எங்கிருந்தோ தப்பித்து வேகமாய் வருகிறது காற்று, கிடைக்கிற இடைவெளிகளில் புகுந்து அது எழுப்பும் ஓசை வினோதமான இசை போல செவிப்பறைகளின் மீது நடனமாடுகிறது, மணல் திட்டு முடிவடைகிற ஒரு நேர்கோட்டின் பின்னே கடலைப் போன்ற ஏரி ஒன்று படுத்திருக்கிறது, மிக மெல்லிய அலைகள் எழுப்பும் ஓசை வேப்பமர நிழலில் தொட்டில் கட்டிக் கிடத்தப்பட்டிருக்கும் குழந்தைக்குத் தாயின் தாலாட்டைப் போல ஆழமாய் ஊடுருவிப் பாய்கிறது.

சேற்றை அப்பிக் கொண்டு நீளவாக்கில் சில நண்டுகள் அச்சமின்றி நடை பழகிக் கொண்டிருக்கின்றன, காலம் குறித்த அக்கறை இல்லாத சில பறவைகள் சிறகுகளை உலர்த்திக் கொண்டிருக்கும் பெயர் தெரியாத நிலப்பரப்பு, சூரியனும், நிலவும் இல்லாத மங்கிய ஒளி நிரம்பிய அந்த மாலையில் கழுத்தை இறுக்கியபடி ஒரு வளைக்கரம், நாசியைத் துளைத்து இதயத்தில் சாரலிடுகின்ற பெண்ணின் நறுமணம்.

ஏரிக்கரையின் ஈரம் முழுதும் அப்பிக் கொண்டிருக்கும் அந்த இதழ்களில் இருந்து மெல்லப் பரவும் அப்பழுக்கற்ற ஒரு நீண்ட முத்தம், மனம் துளைத்து, மூளையில் உறைத்து, உடலை அடையும் போது விழிப்பு வந்து விடுகிறது. அந்த விழிப்பு வந்திருக்கக் கூடாது என்று மனம் ஏங்கும், உடல் அந்தக் காட்சி இன்பங்களையும், புலன் இன்பங்களையும் தேடித் திரியும் ஒரு சிறு மாமிசத் துண்டு போல படுக்கையில் கிடக்கும்.

இப்படி ஒரு கனவை நீங்களும் எப்போதாவது கண்டிருக்கக் கூடும், கனவுகள் பல நேரங்களில் திரும்ப மீட்டெடுக்க முடியாத பல இடங்களை, நினைவுகளை நம்மிடம் புதைத்துவிட்டுத் தப்பி ஓடி விடுகின்றன, முடிவு தெரியாத பல கனவுகள் நமது உறக்கம் கலைத்திருக்கின்றன, கனவுகளுக்கும் நமக்கும் இடையிலான உறவு தாய்க்கும், பிள்ளைகளுக்கும் இடையிலான உறவைப் போல மிக நெருக்கமானதாகவும், விளக்க முடியாத ஒன்றாகவுமே எப்போதும் இருக்கிறது.

கனவுகள், மனம் என்கிற கட்டுக்குள் அடங்காத ஆற்றலை உடல் என்கிற சிறு பாத்திரத்தில் அடைத்து விளையாடிப் பார்க்கிறது, உயர்ந்த மலைச்சிகரம் ஒன்றின் கீழே மேய்ச்சலில் இருக்கும் குட்டி ஆடுகளைப் போல நாம் அவற்றை உணர்கிறோம், உண்மையில் கனவுகள் மனிதனுக்குக் கிடைத்திருக்கும் அளப்பரிய மருந்து, ஆழ்மனத்தில் ஒவ்வொரு மனிதனும் கட்டி வைத்திருக்கிற கொடிய விலங்கொன்றைத் தப்பிக்க விடாமல் காக்கும் வேலியைப் போல கனவுகள் முடிவின்றிப் பிறந்து கொண்டே இருக்கின்றன.

dreams

சினத்தை, இயலாமையை, ஆழ்ந்த கவலையை, காதலை, காமத்தை, வெறுப்பை, காழ்ப்புணர்வை இன்னும் எல்லா மனித உணர்வுகளையும் கனவுகள் ஆற்றுப்படுத்துகின்றன, முத்தமிட முடியாதவர்களைக் கனவுகள் மிக எளிதில் முத்தமிடுகின்றன, கொல்ல முடியாதவர்களைக் கனவுகள் கொன்று அழித்து விடுகின்றன.

கனவுகள் குறித்த மனிதனின் வியப்பு கடவுளைப் போலவும், மரணத்தைப் போலவும் மிக நீண்டு கிடக்கிறது, கனவுகள் எதிர்காலத்தை உணர்த்தும் கடவுளின் குறியீடுகள் என்று ஆதி மனிதன் அவற்றை வகைப்படுத்தி வைத்திருந்தான். கனவுகளைக் கண்டு அஞ்சினான், கனவுகளைக் கொண்டாடினான். கனவுகளைக் குறித்துக் கதைகள் சொன்னான்.

கனவுகளைக் குறித்த மிகப்பெரிய உண்மைகளைக் கண்டறிந்த "சிக்மன்ட் ப்ராய்டு", கனவுகள் மனித மனதிற்கு ஆற்றும் அளப்பரிய சேவைகளைப் வியந்து போற்றுகிறார், மனிதனின் கனவுகள் பெரும்பாலும் அவனது அடிமனதில் புதைக்கப்பட்டிருக்கும் ஆசைகளில் இருந்தே துவங்குகிறது, மன எழுச்சி மிகுந்த ஒரு மனிதனின் கனவில் போரும், போராட்டமும், வெற்றியும் வருகின்றன, மனம் துவண்டு வாடும் ஒரு மனிதனின் கனவில் மரணமும், கல்லறைகளும், பிணங்களும் வருகின்றன என்று விளக்குகிறார் "சிக்மண்ட் ப்ராய்டு".

தொலைவில் சன்னமாக ஒலிக்கிற இடி மனிதனின் கனவில் ஓசை மிகுந்த ஒரு கூட்டத்தை வரவழைக்கிறது, காலுக்கடியில் வைக்கப்பட்டிருக்கும் கொசுவத்திச் சுருளின் வெம்மை மனிதனின் கனவில் கடும் தீயின் நடுவே சிக்கிக் கொள்கிற அச்சத்தைத் தோற்றுவிக்கிறது. கனவுகளில் இரண்டு வகைகள் இருப்பதாக அரிஸ்டாட்டில் சொல்கிறார், நள்ளிரவில், ஆழ்ந்த உறக்கத்தில் வருகிற கனவுகள் நீண்ட காலத்துக்கு முற்பட்ட நினைவில் இல்லாத நிகழ்வுகளை உள்ளடக்கி இருப்பதாகவும், அதிகாலையில் முதல் நிலை உறக்கத்தில் இருக்கிற மனிதனின் கனவில் குறுகிய கால நிகழ்வுகள் உள்ளடக்கப்பட்டிருப்பதாகவும் அரிஸ்டாட்டில் தனது ஆய்வுகளில் சொல்கிறார்.

தனது ஆய்வுக் குறிப்புகளில் "சிக்மன்ட் ப்ராய்டு" விவரிக்கும் கனவுகள் ஹாரிபாட்டர் கதைகளை விஞ்சும் அளவுக்கு சுவையானவை மட்டுமில்லை, வியப்பானவையும் கூட, கனவுகளின் பிறப்பிடத்தையும், அவற்றின் தேவைகளையும் உணர்த்திய சிக்மன்ட் ப்ராய்டு மருத்துவ உலகில் கடவுளை விட மேலான இடத்தில் வைக்கப்பட்டிருக்கிறார்.

140696,xcitefun-fact-2

டெல்போப் என்கிற மருத்துவரின் கனவொன்றில் வரும் நிகழ்வுகள் கனவைப் பற்றிய ஒரு புரிதலை நமக்கு அளிக்கின்றன. அந்தக் கனவு எல்லா மனிதர்களின் கனவைப் போலவும் ஒரு நெடிய இரவில் தான் உருவாகி இருக்கிறது, நிலவும், சில விண்மீன்களும், விழித்திருக்கும் மனிதர்களை வேடிக்கை பார்த்தபடி பயணிக்கையில் டெல்போப் உறங்கத் துவங்குகிறார், அப்போது அவருக்கு வயது இருபத்து ஏழு, ஆழ்ந்த உறக்க நிலைக்கு அவர் சென்ற பிறகு, ஒரு பனி படர்ந்த காடு, அங்கு நிறைந்திருக்கும் மரங்களின் இலைகளில் வெண்பனி சொட்டிக் கொண்டிருக்கிறது, டெல்போப் தனது கால்களைத் தரையில் ஊன்றாது அந்தக் காட்டில் பயணம் செய்கிறார்.

அநேகமாகப் பறக்கிறார், பனி கூரையை நிரப்பி இருக்கிற ஒரு தோட்டத்து வீட்டுக்குள் நுழைகிறது அவரது நினைவுகள், அதன் சுவற்றில் இரண்டு குட்டிப் பல்லிகள் பனிக்குள் அடைபட்டிருக்கின்றன, எந்தச் சிறு விலங்குகளையும் நேசிக்கும் டெல்போப் அந்தக் குட்டிப் பல்லிகளை பனிக்குள் இருந்து விடுவித்து வெப்பம் கொடுக்கிறார், உயிர் காக்கிறார், பிறகு அந்தச் சுவற்றில் ஒரு குருஞ்செடியின் இலைகளைப் பரப்பி அந்தப் பல்லிகள் வாழ்வதற்கு வகை செய்கிறார்.

கனவில் அந்தச் செடியின் முழு மருத்துவப் பெயர் மிகத் தெளிவாக அவருக்குத் தெரிகிறது, "அஸ்ப்லேனியம் ரூட்டா முராலிஸ்" ( Asplenium Ruta Muralis), விழிப்பை அடைந்த பிறகு டெல்போப் வியப்படைகிறார், தாவரங்களின் இலத்தீன் பெயர்கள் ஒன்றிரண்டை மட்டுமே அவர் தெரிந்து வைத்திருக்கிறார், இவ்வளவு நீளமான ஒரு தாவரத்தின் பெயரை அவர் இதுவரையில் அறிந்திருக்கவில்லை.

தாவரவியல் நூல்கள் பலவற்றைப் புரட்டி உண்மையிலேயே அப்படி ஒரு தாவரம் இருப்பதையும், கனவில் பல்லிகளைக் காப்பாற்ற அந்தத் தாவரத்தின் இலைகளையே அவர் பயன்படுத்தியதையும் உணர்கிறார். இந்தக் கனவு தோன்றிய வருடம் 1862, கனவை ஒரு காலத்தில் மறந்து விடுகிறார் டெல்போப், காலங்கள் உருண்டோடி ஒரு மருத்துவராகவும், தத்துவ அறிஞராகவும் வளர்கிறார்.

சரியாகப் பதினாறு ஆண்டுகள் கழித்து ஒரு நண்பனைச் சந்திக்க சுவிஸ் நாட்டுக்குச் செல்கிறார் டெல்போப், அந்த நண்பனின் வீட்டின் நூல்கள் அடுக்கப்பட்டிருக்கும் மரப்பலகை இடுக்குகளில் இருந்து ஒரு சிறு நூலை வெளியில் எடுக்கிறார், அதன் உள்பக்கங்களில் பல்வேறு தாவரங்களின் இலைகள் பதம் செய்யப்பட்டு ஒட்டப்பட்டிருக்கின்றன, ஒவ்வொரு பக்கமாகப் புரட்டிக் கொண்டு வரும்போது டெல்போப் திக்கித்து நிற்கும் படி ஒரு பக்கம் வருகிறது.

mature-bald-eagle-group_847

அந்தப் பக்கத்தில் "அஸ்ப்லேனியம் ரூட்டா முராலிஸ்" என்கிற கனவில் வந்த அந்தத் தாவரத்தின் இலை ஒட்டப்பட்டிருக்கிறது, இதில் என்ன வியப்பு என்கிறீர்களா? இருக்கிறது, நண்பர்களே, அந்த இலை ஒட்டப்பட்டிருந்த பக்கத்தின் கீழே டெல்போப்பின் தெளிவான கையெழுத்தில் "அஸ்ப்லேனியம் ரூட்டா முராலிஸ்" என்று எழுதப்பட்டிருக்கிறது.

டெல்போப் தீவிர குழப்பத்தில் வீழ்கிறார், பிறகு தனது பிந்தைய நாட்கள் குறித்த விசாரணையில் இறங்குகிறார், கனவு உருவான இரண்டு ஆண்டுகளுக்கு (1860 ) முன்னாள், நண்பனின் குடும்பம் டெல்போபின் வீட்டுக்கு வருகிறது, நண்பனின் அக்கா தாவரவியல் படிக்கிறாள், வரும்போது தன்னோடு கூட எடுத்துக் கொண்டு வந்த பள்ளிப் பயிற்சி நூலில் இலைகள் ஒட்டப்பட்டிருக்கப் பெயர்கள் எழுதப்படாமல் இருக்கின்றன, டெல்போபின் கையெழுத்து நன்றாக இருக்கும் என்று நண்பனின் அக்கா, இலைகளுக்குக் கீழே பெயர்களை எழுதித் தருமாறு வேண்டுகிறாள், டெல்போப் எழுதிக் கொடுக்கிறார்.

இப்போது கனவின் சாரத்தைக் கண்டு பிடிக்கிறார் டெல்போப், என்றோ ஒரு நினைவு தெரியாத நாளில் அவர் எழுதிக் கொடுத்த அந்தப் பெயரை அவர் மறந்து விட்டிருக்கிறார், ஆனால், அவரது ஆழ்மனம் அந்தப் பெயரை மறக்கவில்லை, நண்பனைப் பிரிந்த ஆழ்மனக் கவலைகளோடு அந்தத் தாவரத்தின் பெயர் பின்னிப் பிணைந்து கிடந்திருக்கிறது.

தனது நட்பு பனியில் உறைந்து போன அந்தப் பல்லிகளைப் போல போலப் பரிதவிப்பதாக அவர் உணர்ந்தார். கனவுகளோடு மனிதனுக்கு இருக்கும் உளவியல் தொடர்பு டெல்போபுக்குப் புரியத் துவங்குகிறது. நமக்கும் கூடத்தான்……

ஆழ்நிலை உறக்கத்தின் போது புலன்களால் உணரப்படும் ஓசைகளும், தொடு உணர்வுகளும் கனவுகளாய் விளைகின்றன என்கிறார் சிக்மண்ட் ப்ராய்டு, உடலின் மீது போர்த்தப்பட்டிருக்கும் போர்வை விலகும் போது தான் நிர்வாணமாய் இருப்பதைப் போலவும், நீருக்குள் குதிப்பது போலவும் கனவு காண்கிறான் மனிதன்.

imagesCADR9QSQ

எங்கேயோ திறக்கப்படும் கதவின் ஒலி திருடர்களைப் பற்றிய கனவைத் தோற்றுவிக்கிறது.

தலையணையில் இருந்து நழுவும் உங்கள் தலைக்குள் இருந்து பெரிய மலை உச்சியில் இருந்து நீங்கள் விழுவது போன்ற கனவுகள் பிறக்கலாம்.

விழிப்பின் போது உடலில் நிகழ்ந்த காயங்கள் இரவில் உங்களை யாரேனும் அடித்துத் துவைப்பதைப் போலவோ, விபத்தில் சிக்கிக் கொள்வதைப் போலவோ ஒரு கனவைத் தோற்றுவிக்கின்றன, அடிமனதில் தங்கி இருக்கிற வலியையும், காயத்தையும் போக்கிக் கொள்வதற்கான ஒரு போராட்டத்தில் உங்கள் உடல் ஈடுபட்டிருக்கிறது.

உடல் காயங்கள் மட்டுமன்றி உளக் காயங்களையும், உளப் போராட்டங்களையும் உடல், கனவுகளின் மூலம் வடிகட்டிக் கொண்டு உங்களை புற உலகோடு வழக்கம் போல இயங்க வைக்க முயற்சி செய்கிறது. நறுமணமும், அழுகிய பொருட்களின் மனமும் கூடக் கனவுகளுக்குக் காரணமாய் இருக்கிறது என்கிறார் சிக்மன்ட் ப்ராய்டு.

உறக்கத்தில் நுழையும் நறுமணம் பல சாகசங்களை உங்கள் கனவில் நிகழ்த்துகிறது, அழுகிய பொருளொன்றின் வாசம் பாறையிடுக்கில் உங்களை சிக்க வைத்துத் தப்பிக்க முயற்சிக்கிறது. பக்கத்துக்கு வீட்டில் இருந்து தப்பி வந்த இசைத்துளி ஒன்று உங்களை ஆட்களற்ற தீவுகளுக்கோ, பாலைவனங்களுக்கோ அழைத்துச் செல்கிறது. நீங்கள் எப்போதோ சந்தித்த அழகிய பெண் அல்லது ஆணை உங்களுக்கு முத்தமிட வைக்கிறது.

மனித மனத்தின் மிகச் சிக்கலான உணர்வு வடிவங்களுக்கும், வலிகள் மற்றும் நோய்கள் உடனான மனத்தின் நெடிய தொடர்புக்கும் கனவு ஒரு பாலமாக இருக்கிறது, கனவுப் பாலம் மனித உடல் இயங்கியலோடு இயல்பாகவே பிணைக்கப்பட்டிருக்கிற ஒரு பரிசு, தொலைதூரக் கிராமங்களுக்கும், துருவங்களுக்கும் நீங்கள் சென்றிருக்க வில்லையென்றால் கூட உங்களை அழைத்துச் செல்கிறது கனவுகள், ஆம், நீங்கள் பார்த்திராத, அல்லது பார்க்க வாய்ப்பே இல்லாத நிலப்பரப்புகளுக்குக் கூடக் கனவுகள் உங்களை அழைத்துச் செல்கின்றன.

எங்கேனும் நீங்கள் படித்திருந்த ஒரு நூலின் பக்கத்தில் அந்தக் கிராமம் பற்றிய குறிப்புகள் எழுதப்பட்டிருக்கலாம், குழந்தையாக இருக்கும் போது உங்கள் பாட்டி சொல்லிய கதையில் இருந்து நழுவி ஒரு கதாபாத்திரம் உங்கள் கனவுகளில் நுழைந்திருக்கலாம், தொலைக்காட்சி நிகழ்வொன்றில் மேடைக்குப் பின்புறமாக வைக்கப்பட்டிருந்த புகைப்படம் ஒன்றின் உயர மலை நீர்வீழ்ச்சிக்கு உங்கள் கனவுகள் உங்களை அழைத்துச் செல்லக் கூடும்.

200px-Sigmund_Freud_LIFE

அழிக்க முடியாத சில ஆசைகளைக் கனவுகள் வெளியேற்றி விடுகின்றன, ஆழ்மனத்தில் அடைந்து கொள்கிற உங்கள் சின்னச் சின்ன ஆசைகள் அன்றாட வாழ்க்கையைச் சுமையாக்கி விடாது கனவுகள் காப்பாற்றுகின்றன.

சில கனவுகள் பறவைகளின் சிறகுகளில் நம்மை அமர்த்திக் கொண்டு தொலை தூர நிலப்பரப்புகளுக்கு அழைத்துச் செல்கின்றன, அங்கிருக்கும் ஓட்ஸ் வயல்களில் இறங்கி அதன் கால்வாய்களின் ஊடாக நமது கால்களை நனைக்கின்றன, இன்னும் சில கனவுகள் கண்ணுக்கெட்டாத கோள்களுக்கு நம்மை அழைத்துச் சென்று திக்கெட்டும் விரவிக் கிடக்கிற அதன் தனிமையைப் பருக வைக்கின்றன.

யாரோ ஒருவரால் புறக்கணிக்கப்பட்ட முத்தத்தை, அலைந்து திரியும் அதன் ஈரத்தை நமது இதழ்களில் பசக்கென்று ஒட்டி விட்டு நம்மை திடுக்கிட்டு விழிக்கச் செய்கின்றன, ஒரு சிறு குழந்தையின் இனிப்புக்கான கண்ணீரை வைத்து உங்கள் உடலை வேர்க்கச் செய்கின்றன, ஒரு முதியவரின் முகச் சுருக்கங்களை வைத்து உங்கள் மனத்திரையைச் சலவை செய்கின்றன. தொட்டிச் செடிகளில் ஆலமரங்களையும், ஆலமரங்களில் தொட்டிச் செடிகளையும் கட்டித் தொங்க விடுகின்றன. கனவுகள் எப்போதும் மனிதனின் கவலைகளைப் போலவோ, குழந்தையின் சிரிப்பைப் போலவோ நம்மைத் துரத்தி வருகின்றன.

நான் கனவுகளுக்காக மட்டுமே உறக்கத்தைத் தேடுகிறேன், பல கனவுகள் நம்மைச் சுற்றி இயங்கிக் கொண்டிருக்கிற புற உலகத்தின் உண்மைகளை விடவும் அழகானதாக இருக்கிறது, அப்படித்தான் நேற்றிரவில் ஒரு கனவு வந்தது.

“சில குதிரைகளோடும், யானைகளோடும் உரையாடியபடி நான் நடந்து கொண்டிருக்கிறேன், சில பாம்புகளும், ஒரு முயலும் எங்கள் பயணத்தில் இணைந்து கொள்ள நாங்கள் எங்கள் கிராமத்துக்குள் நுழைகிறோம், நடக்க முடியாத காயமடைந்த பாம்பொன்றை கையிலெடுத்து என் தோள்களில் ஒரு துண்டைப் போல அணிந்து கொள்ள, அதன் பிளவுற்ற நாவுகள் என் கன்னங்களில் ஈரம் செய்கின்றன, காலம் காலமாய் எங்கள் கிராமத்தில் பகையாய் வசிக்கிற இரு வேறு சாதிக் குடும்பங்கள் ஒரே நேரத்தில் ஊர்க் கோவிலில் பொங்கலிட்டுக் கொண்டிருக்கிறார்கள், ஒரு விநாயகர் சிலைக்கு மேலாக அல்லா மிகுந்த கருணையுள்ளவன் என்று எழுதி வைத்திருக்கிறார்கள், மூஞ்சுறு இருக்கும் இடத்தை இப்போது இயேசு பிடித்துக் கொண்டிருக்கிறார். எங்கள் ஊரில் ஏழைகள் இல்லை, எங்கள் ஊரில் பண்ணைகள் இல்லை, வரப்புகள் அற்ற விளைநிலத்தில் வீட்டுக்கொருவராக வேலை பார்க்கையில் களைப்பு நீங்க ஒரு நாட்டுப்புறப் பாடலைத் தனது கிடாரில் இசைத்தபடி ஆடிக் கொண்டிருக்கிறார் வெளுத்த தோலுடைய ஒரு மனிதர், பக்கத்தில் போய்ப் பார்த்தால் அட நம்ம "ஜேம்ஸ் ப்ளன்ட்".

 

2231213430_bea810765a

மார்க்சுடைய கனவாம், எப்படியோ தப்பித்து என் வீட்டறைக்குள் எப்படி வந்தது என்று பார்த்தால், விடிந்து வெள்ளைக் கோழி கூவி விட்டிருக்கிறது……………..

************

Reference :- “The Interpretation of Dreams” by Sigmund Freud


மறுமொழியொன்றை இடுங்கள்

Fill in your details below or click an icon to log in:

WordPress.com Logo

You are commenting using your WordPress.com account. Log Out / மாற்று )

Twitter picture

You are commenting using your Twitter account. Log Out / மாற்று )

Facebook photo

You are commenting using your Facebook account. Log Out / மாற்று )

Google+ photo

You are commenting using your Google+ account. Log Out / மாற்று )

Connecting to %s

பிரிவுகள்

%d bloggers like this: